️Сентябрь 30 - ниң хүнүнде Ак-Довурак хоорайның А.Үержаа аттыг төп ном саңынга тевекке Тыва Республиканың каш дакпыр тиилекчизи Отчугаш Валерьевич Хомушку-биле онза-солун ужуражылга болуп эрткен.
️
Аңаа Ак-Довурак хоорайның №2 ортумак школазының 5-ки болгаш 8-ки класстарының оолдары киришкен (башкызы Сарыглар Херел Танмаевич).
Ужуражылганың сорулгазы - школа назынныг оолдарга тевектиң тевер хевирлерин айтып бээри, сонуургадыры болгаш өөреникчилерни хостуг үе-шагын ажыктыг чүүлдерже, спортче угландырарынга идигни бээри, тевек талазы-биле шыырак дээн спортчу-биле таныштырбышаан, өөреникчилерге эки үлегер-чижекти көргүзери .
Ужуражылга үезинде «Тевекти кылыры» деп видеоматериалдарны, «Саян» ыры-сам ансамблиниң «Тевек» деп видеоролигин, Отчугаш Валерьевичтиң дугайында материалдарны ном саңының ажылдакчылары көргүскен.
Отчугаш Валерьевич бодун өөреникчилерге таныштыргаш, 5-6 класстан-на кудумчуга ойнап тургаш, тевектеп эгелээнин, 8-9 класс үелеринде кожуун чергелиг тевек мѳѳрейлеринге киржип турганын чугаалаан. Ол үелерде Отчугаш Валерьевич тевекти 300 ажыр тептер турган. Амгы үеде ол тевекти 3000 ажыр тептерин шупту билир бис. Өске чоннарның мөөрейлеринге Тываның адын бедик деңнелге тудуп чоруур тевек оюнунуң тергиин ойнакчызынга, нептередикчизинге, Барыын-Хемчик кожууннуң төлептиг оглу О.В.Хомушкуга К.Б.Ондар аттыг тыва улустуң езу-чаңчылдарының, аас чогаал болгаш ус-шеверлер төвү Барыын-Хемчик кожууннуң 100 чыл оюн таварыштыр “Тевектиң күчүтени” деп бедик атты, Тыва республиканың «Спорттуң тергиини» деп медальды 2025 чылдың сентябрь 20-де тывыскан.
Отчугаш Валерьевич тевекти канчаар кылырын тайылбырлап, тевектиң «далбыыр», «чиңнээр», «кызыл-чин», «човадыр» деп аргаларын оолдарга көргүзүп бээрге, олар база улуг сонуургал-биле ойнап шенээннер. Оон бир онзагай чүүл - улуг маргылдаалар үезинде тевекчи кижи тускай шыйып азы шарып каан кызыгаар иштинден үнүп болбас деп чүвени оолдар хүндүлүг аалчыдан билип алган.
Ужуражылга үезинде киржикчилер чемпионга тывыскан медаль болгаш мөңгүн-биле сиилбип-каастаан тускай бөрттү кымны мурнай тудуп көөр аас-кежиктиг болганнар. Отчугаш Валерьевич өөреникчилерге тура-соруктуг, кежээ болурун чагып, тевекти сонуургап, нептередип, спортчу оюннарны ойнап, мага-бодун сайзырадып чоруурун күзеп каан.
Ужуражылга солун болгаш өөредиглиг болганын киржикчилер демдеглээн, а башкы Х. Т. Сарыглар бо оюнну нептередип, школага тускай ажылды чорударын дагдынган.
Тевек моорейи
30 Сен.
